Tekuyung
From IbanWiki, an Iban Encyclopedia
English: Snail
Malay: Siput
Tekuyung siti ari bansa jelu ti diberi dalam kategori Invetebrata ari kelas Moluska. Jelu tu kerubungn kulit ti kering sereta bepulas (coiled). Tekuyung semina nemu ngerayap lalu idup ba darat, ai tasik (salt water) enggau ai sungai (fresh water).
Bansa tekuyung
Suah agi tekuyung diberi nama nitihka alai ia idup. Ambika banding, tekuyung ti lekat ba bundung disebut tekuyung bundung lalu tekuyung ti lekat ba pun apung dikumbai tekuyung apung.
- Tekuyung batu
- Tekuyung jipun
- Tekuyung apung
- Tekuyung bundung
- Tekuyung pasang
- Tekuyung rau
- Belungkin
Pemakai
Sekeda tekuyung tau dipakai, lalu sekeda ia bisi ngembuan rachun. Kitai Iban suah agi nyumai tekuyung ngena jalai ngerebus lalu dichampur enggau serai aja. Diatu, tekuyung disumai sereta digulai mayuh macham utai baka santan, sos tiram, kicap enggau mayuh agi. Bisi mega urang manggang tekuyung.
Laban tekuyung ngembuan kerubung ti kering, ujung ia deka ditetak dulu ngambika nyamai disirut (ngena mulut) dikena ngulihka isi ia. Kelimpah ari nya, bisi bansa tekuyung ti disungkit tauka dipechahka kerubung ia dikena ngulihka isi.
Sempama jaku
Leka jaku tekuyung mega bisi dikena Iban berandau dikena sida nyilupka penemu tauka jaku ti kasar.
- Malu tekuyung - Malu beperening mua tauka betunga mua, tang nyeling-nyeling ari tisi mata. Lebih agi enti urang indu enggai ngayanka diri rinduka siku-siku lelaki. Tauka enti urang nya udah salah jaku lalu maluka jaku diri ti udah salah dipansutka
Penyanding Penemu
| Lambar tu agi bedau engkeman lalu agi begunaka penerang ti bisi reference nyemetak. Bantu kami ngerembaika lambar tu ngena jalai nambah info ti tegap. Sebarang penerang ti enda tegap lalu agi ulih dipejuraika enda tau diengkah ditu. Kita tau bejuraika penerangnya ba discussion. (Dec 2008) |
