Manuk

From IbanWiki, an Iban Encyclopedia

English: Chiken
Malay: Ayam

Manuk (Gallus gallus) tu siti ari jelu tupi ti tau diempa isi enggau telu iya. Bisi mega dipadahka asal manuk tu datai ari Manuk Mirah Asia (Asian Red Junglefowl).

Manuk mega sebansa burung ti suah dipeda sereta idup ba mayuh bengkah menua ba dunya tu. Firefly Encyclopedia of Birds madahka bisi 24 bilion iku manuk idup ba dunya dalam kandang taun 2003.

Manuk tu bansa jelu ti ulih makai mayuh macham utai. Iya ulih makai leka utai, daun, indu utai sereta dagin. Taja pia, manuk ti ditupi diberi pemakai ti menyana baka leka padi, asi enggau baja.

Taja pan manuk bisi sayap, iya enda ulih terebai jauh baka burung bukai.

Dagin manuk ti udah dipanduk tau diempa ngena asi tauka diipung.

Manuk suah bendar dilepas pia aja lalu sida suah tinduk ba puchuk kayu; taja pia manuk indu ke betelu disimpan ba dalam kerungan di baruh rumah. Manuk sabung diengkah ba tempuan.

Bansa Manuk

Dalam daya idup Iban, manuk tu endang besai bendar reti kelebih agi dalam pengidup besehari-sehari. Dirintaika di baruh tu sekeda nama manuk nitih ke suah dikena bala Iban.

1. manuk lanjau nya manuk lelaki ke baru ngangkatka diri
2. manuk jagau nya manuk China tauka manuk ke diimport
3. manuk sigun nya manuk ke udah tuai lalu ngembuan iku ke panjai
4. manuk bangka(') nya manuk ke diempu Keling ti disimpan iya dalam bangka tauka tajau
5. manuk bangkut nya manuk ti beiku pandak lalu baka manuk indu
6. manuk ketupung mega manuk sabung tauka manuk lelaki ke pandak iku
7. manuk bandung nya manuk besapit ti mechah ari sigi telu aja

Bansa Iban mega ngenamaka manuk kelebih agi manuk sabung belalauka jelu baka ikan, burung, indu utai enggau reptilia. Chunto chura bulu manuk belalauka jelu ke disebut nya tadi:

1. Bulu manuk belalauka ikan:
   1. adung
   2. bangkas
   3. banta
   4. baung
   5. engkerik
   6. enseriban
   7. jalak
   8. kepiat
   9. mulau
   10. semah
2. Bulu manuk belalauka burung:
   1. empitu
   2. engkerasak
   3. ensulit
   4. kuchit
   5. menaul
   6. pipit
   7. sempidan
   8. sengayan
   9. tajai
3. Bulu manuk belalauka indu utai:
   1. empelawa
   2. kesa
   3. kesulai
   4. lalat
   5. manyi
   6. menaning
   7. panggang
   8. pantak
4. Bulu manuk belalauka reptilia:
   1. beluai
   2. engkarung
   3. jelayan

Pengarap Iban

Manuk enggau telu iya suah bendar disimpan dikena maya miring.

Adat Iban

Manuk mega dikena mayar ukum lebuh maya orang bisi kena tunggu.

Sempama Jaku

Leka jaku manuk mega bisi dikena bala Iban berandau lebuh sida nyilupka penemu tauka jaku ti kasar.

1. 'Tau didinga kukuk manuk' dikena nyemaka penyemak / semak amat.
2. 'Maya kukuk manuk' nunjukka hari nyau teberingkas tawas.
3. Anak iya 'beapaika manuk' meri reti anak ampang.
4. 'Kukuk manuk maya malam' madahka ai pasang besai.
5. 'Apin didunggul, baka manuk' mai reti empai disunat tauka ditutus.
6. 'Idup manuk' mai reti enda merinsa ngidupka diri.
7. 'Kair pantuk baka manuk' madahka reti ulih sehari diempa sehari.
8. 'Manuk lepas, jari bau tai' reti orang ke deka ngulihka utai ti manah tang utai nya enda ulih, semina bulih penusah.

Lambar tu agi bedau engkeman lalu agi begunaka penerang ti bisi reference nyemetak. Bantu kami ngerembaika lambar tu ngena jalai nambah info ti tegap. Sebarang penerang ti enda tegap lalu agi ulih dipejuraika enda tau diengkah ditu. Kita tau bejuraika penerangnya ba discussion. (Dec 2008)